ច្បាស់ហើយ ទីបំផុតសាកលវិទ្យាល័យ West Point ចេញមកបញ្ជាក់ច្បាស់ៗថា គ្មានការចេញសញ្ញាបត្រ ២ខុសគ្នាទេសម្រាប់និស្សិតអន្តរជាតិ ។ ពោលគឺការចោទប្រកាន់របស់អតីតមេដឹកនាំនៃអតីតគណបក្សប្រឆាំង លោក សម រង្ស៊ី ដែលបានចោទប្រកាន់ម្តងជាពីរដង ថាសញ្ញាប័ត្ររបស់លោក ហ៊ុន ម៉ាណែត កូនប្រុសច្បងរបស់សម្តេច ចេញពីសាលាយោធា West Point ជាសញ្ញាបត្រកម្រិត២ ឬសញ្ញាបត្រយោគយល់ !!!!
ដោយះ លោក ពេជ្រ ចាន់វិជ្ជា
ចេញផ្សាយថ្ងៃ សុក្រ 5 កើត ខែ បុស្ស ឆ្នាំឆ្លូវ ត្រីស័ក ព.ស.2565 ត្រូវនឹង ថ្ងៃទី 07 ខែ មករា ឆ្នាំ
2022
ព័ត៌មានជាតិ
រាជធានីភ្នំពេញះ
យោងតាមការចេញផ្សាយរបស់ទូរទស្សន៍ជាតិកម្ពុជា (ទទក) បានស្រង់សម្តី មន្ត្រីជំនាញផ្នែកកិច្ចការសាធារណផ្នែកទំនាក់ទំនងប្រព័ន្ធផ្សព្វផ្សាយនៃបណ្ឌិតសភាយោធា West Point គឺលោក Francis J DeMaron Jr. បានបញ្ជាក់ ថា តម្លៃសញ្ញាបត្រនៅបណ្ឌិតសភាយោធាអាមេរិក West Point គ្មានការបែងចែក ឬភាពខុសគ្នារវាងសិស្សក្នុងស្រុក និងសិស្សមកពីបរទេសនោះទេ ហើយលោកសង្ឃឹមថា ការបញ្ជាក់ទាំងនេះនឹងបញ្ចប់ភាពចម្រូងចម្រាស់នៃតម្លៃសញ្ញាបត្រសាលារបស់លោកផងដែរ ។
ជាមួយគ្នានោះផងដែរ ឆ្លើយតបនឹងសំណួររបស់ EAC News លោក Francis J DeMaron Jr. បានបញ្ជាក់ថា «អ្នកគ្រប់គ្នាដែលបានបញ្ចប់ការសិក្សាពីបណ្ឌិតសភាយោធាសហរដ្ឋអាមេរិកនឹងទទួលបានបរិញ្ញាបត្រផ្នែកវិទ្យាសាស្ត្រគឺគ្មានភាពខុសគ្នា ឬការតម្រូវផ្សេងសម្រាប់បេក្ខជនអន្តរជាតិនោះទេ។ ខ្ញុំសង្ឃឹមថានេះអាចជួយបញ្ជាក់ពីភាពចម្រូងចម្រាសបាន» ។
ការបញ្ជាក់របស់បណ្ឌិតសភាយោធាអាមេរិកនៅពេលនេះ អាចចាត់ទុកជា ការបញ្ចប់នូវការលើកឡើងដោយគ្មានអំណះអំណាងរបស់លោក សម រង្ស៊ី កាលពីកន្លងទៅដែលបានវាយប្រហារមកលើតម្លៃសញ្ញាបត្ររបស់លោក ហ៊ុន ម៉ាណែត ថា ជាសញ្ញាបត្រកម្រិត២ ឬសញ្ញាបត្រយោគយល់ ។
កាលពីថ្ងៃទី៦ ខែមករា ឆ្នាំ២០២២ ម្សិលមិញ អ្នកនាំពាក្យស្ថានទូតអាមេរិកប្រចាំកម្ពុជាលោក Chad Roedemeier ក៏បានឆ្លើយតបដែរថា បញ្ហាសញ្ញាបត្រ ឯកឧត្តម ហ៊ុន ម៉ាណែត ត្រូវបានសាលាទាហានអាមេរិក West Point បកស្រាយរួចហើយ កាលពីឆ្នាំ២០១៩ ដែលមានន័យថា ស្ដង់ដាសញ្ញាបត្ររបស់សាលាអាមេរិកមិនមានការបែងចែកស្ដង់ដារកម្រិត២ ឬសញ្ញាបត្រយោគយល់ដូចដែលលោក សម រង្ស៊ី លើកឡើងនោះទេ ។
សូមជម្រាបថា ការបកស្រាយត្រូវបានធ្វើឡើង បន្ទាប់ពីលោកសម រង្ស៊ី បានវាយប្រហារចំពោះសញ្ញាបត្រឯកត្តមហ៊ុនម៉ាណែតថា គ្មានស្តង់ដា ។លោក ហ៊ុន ម៉ាណែត បច្ចុប្បន្នមានវ័យ ៤៤ ឆ្នាំ ។ លោក ហ៊ុន ម៉ាណែត ជាកូនប្រុសច្បងរបស់សម្តេចតេជោ ហ៊ុន សែន ដែលកំពុងពាក់ផ្គាយ៣លើស្មា និងមានតួនាទី ជាអគ្គមេបញ្ជាការរង នៃកងយោធពលខេមរភូមិន្ទមេបញ្ជាការកងទ័ពជើងគោករួមជាមួយនឹងមេបញ្ជាការកងទ័ពជើងគោក ៕
ដោយះ គេហទំព័រ បារមីមានរិទ្ទិ លោកយាយម៉ៅ
https://www.bmm-news.com/
