លោក Yoshihide Suga នាយករដ្ឋមន្ត្រីជប៉ុន អំពាវនាវដល់ប្រជាពលរដ្ឋ ឲ្យប្រារព្ធពិធីឆ្លងឆ្នាំថ្មី ដោយស្ងប់ស្ងាត់ និងចៀសវាងការជួបជុំគ្នាច្រើន !!!!
ដោយះ លោក ពេជ្រ ចាន់វិជ្ជា
ប្រែសម្រួលពីសារព័ត៌មាន CNA
ចេញផ្សាយថ្ងៃ សៅរ៍ ១២កើត ខែបុស្ស ឆ្នាំជូត ទោស័ក ពុទ្ធសករាជ ២៥៦៤ ត្រូវនឹងថ្ងៃទី ២៦ ខែ ធ្នូឆ្នាំ២០២០
ព័ត៌មានអន្តរជាតិ
(រាជធានីតូក្យូ)៖
នាយករដ្ឋមន្រ្តីជប៉ុន លោក Yoshihide Suga នៅថ្ងៃសុក្រ ទី២៥ ខែធ្នូនេះ បានអំពាវនាវដល់ប្រជាជនរបស់ខ្លួន ឲ្យចំណាយពេលវេលានៃការចូលឆ្នាំថ្មីនៅឆ្នាំនេះ ដោយស្ងប់ស្ងាត់ និងមិនត្រូវមានការជួបជុំគ្នាច្រើនឡើយ ដើម្បីចូលរួមទប់ស្កាត់ការឆ្លងរីករាលដាលនៃជំងឺ COVID-19 ដែលកំពុងស្ទុះឡើងជាលំដាប់។ នេះបើយោងតាមការចេញផ្សាយដោយ សារព័ត៌មាន CNA។
នាយករដ្ឋមន្រ្តីជប៉ុនរូបនេះ បានប្រាប់សន្និសីទសារព័ត៌មានមួយនៅទីក្រុងតូក្យូ នៅថ្ងៃសុក្រនេះថា«ខ្ញុំ ចង់ឲ្យអ្នកទាំងអស់គ្នា ចំណាយពេលវេលាដ៏ស្ងប់ស្ងាត់មួយសម្រាប់ឆ្នាំថ្មីនេះ។ ព្រោះការឆ្លង មិនទាន់ថយចុះទេ ហើយប្រសិនបើយើងនៅតែបន្តដូចនេះ យើងនឹងមិនអាចជៀសផុតពីជំងឺរាតត្បាតសកលមួយនេះបានទេ»។
គួរបញ្ជាក់ថា នៅថ្ងៃសុក្រនេះដែរ ជប៉ុនបានរកឃើញករណីឆ្លងកូវីដ-១៩ ទម្រង់ថ្មី ជាលើកដំបូង ចំនួន ០៥ករណី នៅលើអ្នកដំណើរមកពីចក្រភពអង់គ្លេស។ ខណៈដែល នាយករដ្ឋមន្រ្តីជប៉ុន លោក Suga បានអំពាវនាវឲ្យចាត់វិធានការធ្វើចត្តាឡីស័កយ៉ាងតឹងរុឹង នៅឯព្រលានយន្តហោះ និងអ្នកដែលវិលត្រឡប់ពីចក្រភពអង់គ្លេស ដើម្បីទប់ស្កាត់ការឆ្លងរាលដាលនៃជំងឺដ៏កាចសាហាវនេះ។ រហូតមកទល់ពេល ជប៉ុនមានករណីឆ្លងសរុប ២០៦,១៣៩ករណី ក្នុងនោះស្លាប់ ៣,០៥០នាក់ និងជាសះស្បើយ ១៧៤,៨៧៩នាក់៕
ដោយះ គេហទំព័រ បារមីមានរិទ្ធិ លោកយាយម៉ៅ
https://www.bmm-news.com/
